Жизнь и вера

Мухьаммад Пайхамар (соллаллох1у 1алайх1и ва саллама) вевзаш хилла, шена цхьа бохам хилча, вон деача, сатохар а, собар а долуш хиларца. Лекхаволчу Делан дашо бохург деш: «Хьайга деанчунна (балина) собаре хила, баккъалла иза (Дала) сацамбинчу г1уллакхех ду» (Къуръан, 31 сурат, аят 17). Вуьшта аьлча - баккъалла иза собаре хилар, Дала омра диначех ду. Веза Сийлахь волчу Делан дашо бохург а деш: «Х1ай, имадиллинарш, аш гIо лаха (шайн дуьненан а, эхартан а г1уллакхаш кахь) собарца а, (деза-сийлахь долчу) ламазца а. Баккъ алла а, Дела ма ву собаре болчаьрца» (Къуръан, 2 сурат, 153 аят). Элча шена т1ебеана бала ловш, ч1ог1а собаре а, сатухуш а хилла, Маккарчу нахах а, уьш боцчарах а, шена вон диначунна гечдар доьхуш, олуш хилла цо: «Х1ай, Аллах1, гечдехьа сан къомана, баккъалла а, уьш ца хууш (ца кхеташ) бу-кха». Иза (1алайх1ис-солату вассалам) Макка чувахана, цо къурайшех болчу цатешачу нахана т1ехь толамбаьккхинчу хенахь ду иза, уьш кхерабелла хилла, шайгара ч1ир эцарна. Элчано цаьрга аьлла: «Ас шайна х1ун дийр ду аьлла хеташ ду шу?». Цара аьлла: «Диканиг дийр ду, хьо тхан сийдолу ваша ма ву, сийдолу вешин к1ант ма ву». Т1аккха Элчано аьлла: «Даг1о, маьрша ду шу». Царна къинт1ера волуш, цо (1алайх1ис-солату вассалам) аьлла: «Баккъалла, Юсуфа Пайхамара шен вежаршка ма-аллара олу ас шуьга: «Дала гечдойла шуна. Иза уггаре къинхетаме верг ву» (Къуръан, 12 сурат, 92 аят). Цкъа цхьана стага ма аьлла Элчане: «Нийсо е, Делан дуьхьа долу, х1ума екъар дац х1ара?» Т1аккха Элчано Мухьаммадан возалла цунна ца хууш долчу х1уманех кхетийна иза. Цунах къинхетам бар а дехна, аьлла цо: «Нийсохьан йир ю, ас ца йича? Ас нийсо ца йича (дуьненахь а, эхартахь а) дакъазвер ма ву со, х1аллакхир ма ву со». Асхьабех цхьаъ и стаг вен лууш вара. Элчано ца вейтира иза. Оьг1аз а ца вахара Элча оцу стагана, цуьнгара ч1ир ца ийцира цо я иза воцчуьнгара а. Сатохарна а, собарна а, шена вон динчунна кьинт1ера валарна а, лаккхара масал дара иза (соллаллох1у 1алайх1и ва саллама). Цхьа стаг веана хилла Пайхамар волчу (соллаллох1у 1алайх1и ва саллама). Цо аьлла: «Суна хьехар дехьа». Собаре волчу Элчано аьлла т1аккха: «Хьо оьг1аз ма г1о». Т1аккха оцу стага ша аьлларг Пайхамаре маситтазза юха элира. Цо жоп делира: «Хьо оьг1аз ма г1о», - аьлла. Вай лардан дезаш дика весет ду х1ара. (Из книги С.Б. Муртазаева «Дахаран масал»)